នារី​វ័យក្មេង​ម្នាក់​ ឆក់​ស្លាប់​ ដោយសារ​តែ​ទូរស័ព្ទ​ iPhone​ 5 ?

ប៉េ​កាំ​ង​៖​ នៅ ​ពេល​នេះ​ ក្រុមហ៊ុន​ Apple​ កំពុង​តែ​ធ្វើការ​ស៊ើបអង្កេត​ ទៅ​លើ​ករណី​នារី​ជនជាតិ​ចិន​ម្នាក់​ បាន​ឆក់​ស្លាប់​ ដោយសារ​តែ​ទូរស័ព្ទ​ដៃ​ iPhone​ 5​ របស់​នាង​ តាម​របាយការណ៍​របស់​ SCMP​ ។​រលឹក ​ដល់​ករណី​នេះ​ បាន​ឲ្យ​ដឹង​ថា​ នារី​ម្នាក់​ដែល​មានឈ្មោះ​ថា​ Ma​ Ailun​ អាយុ​ ២៣​ឆ្នាំ​ ជា​អ្នកធ្វើការ​របស់​ក្រុមហ៊ុន​អាកាសចរណ៍​ China​ Southern​ បាន​ឆក់​ស្លាប់​ នៅ​ពេល​ដែល​នាង​លើក​ទូរស័ព្ទ​ ខណៈ​ពេល​ដែល​ទូរស័ព្ទ​របស់​នាង​ កំពុង​តែ​សាក​ថ្ម​នោះ​។​​ នៅ​ក្នុង​នោះ​បងប្រុស​របស់​នារី​រង​គ្រោះ​ បាន​និយាយ​ប្រាប់​ Apple​ Daily​ ថា​ ក្រុម​គ្រួសារ​របស់​លោក​ជឿជាក់​ថា​ នាង​បាន​ស្លាប់​ ដោយសារ​តែ​ ឆក់​នឹង​ទូរស័ព្ទ​ ដែល​នៅ​ក្នុង​ពេល​នេះ​ ប៉ូ​លី​ស​នៅ​ក្នុង​ Xinjiang​ ក៏​កំពុង​តែ​ធ្វើការ​អង្កេត​ផង​ដែរ​។​បន្ទាប់ ​ពី​រឿង​នេះ​ត្រូវ​បាន​ ផ្សព្វផ្សាយ​ មាន​អ្នក​ប្រើប្រាស់​អ៊ិ​ន​ធើ​ណេ​ត​ មួយ​ចំនួន​ នាំ​គ្នា​និយាយ​ថា​ ការ​ប្រើប្រាស់​ទូរស័ព្ទ​ដៃ​ ក្នុងអំឡុងពេល​ដែល​សាក​ថ្ម​នេះ​ ពិតជា​គ្រោះថ្នាក់​ណាស់​។​ ជាមួយ​គ្នា​នោះ​ តាម​អ្នកជំនាញ​នៅ​ក្នុង​ហុងកុង​ បាន​ធ្វើការ​ព្រមាន​ទៅ​លើ​ អ្នក​ប្រើប្រាស់​គ្រឿង​អេ​ឡិច​ត្រូ​និ​ច​ ខណៈ​ពេល​ដែល​សាក​ថ្ម​នោះ​ ព្រោះ​អាច​បណ្ដាល​ឲ្យ​មាន​គ្រោះថ្នាក់​ផ្សេងៗ​ ជាយថាហេតុ​បាន​៕